رجل يدعي على أولاده؟؟؟؟؟؟؟؟

بسم الله الرحمن الرحيم
اقــــدم لكـــم في هذا الموضوع قصيدة أحزنتني
وهي لرجل كبير فالسن تركوه أولاده وذهب كل منهم مع إمرأته وتركوه وحيدا لاأحد يرعاه اليكم هذه القصيدة:
قال الذي يقرى بليا مكاتيب..
يلي تقرون العمى من عماكم
ياعيالي ألي تشرفون المراقيب..
تريضولي واقصروا في خطاكم
خذوا كلام الصدق مابه تكاذيب..
مثل السند مضمون للي وراكم
ياعيال لاصرتوا ضيوف ومعازيب..
ترى الكلام الزين ملحة قراكم
وتروا السبابه من كبار الغذاريب..
وهرج البلايس مايطول لحاكم
المذهب الطيب فهو مذهب الطيب..
والمذهب الخايب يبور نساكم
ياعيال ماسرحتكم باللواهيب..
اعيال ماعمر المعزب ولاكم
ياعيال ماضربتكم بالمشاعيب..
ولا سمعوا الجيران لجة بكاكم
ياما توليت القبايل تقل ذيب..
من خوف لا ينقص عليكم عشاكم
وياما شربت السمن من عرض ماجيب..
يفز قلبي يوم يبكي حداكم
احفيت رجليني بحامي اللواهيب..
وخليت لحم الريم يخالط عشاكم
ياعيال دوكم لحيتي كلها شيب..
هذا زمان قعودنا في ذراكم
قمت اتوكا فوق عوج المصاليب..
قصرت خطانا يوم طالت خطاكم
عطوني القرضه عليكم مطاليب..
عطوني القرضه جزا من جزاكم
لابد يوم عاوي دوني الذيب..
القبر مافرق طيبكم من رداكم
ماني بفاضحكم بوسط الأجانيب..
باعمالكم يدرون كل اقرباكم
خوالكم بالطيب تروي المغاليب..
ولو تتبعون الجد محد شناكم
وش علمكم ياتاركين المواجيب..
حسبي عليكم هالردى من وين جاكم
قصيتكم واسندت وادي سلاحيب..
ولقيت بالصبخا مدافيق ماكم
ياعيال بعتوني بصفر العراقيب..
ماهي حقيقه سود الله قراكم
يالله عسى اعماركم شمسها تغيب..
يعتم قمركم ثم تظلم سماكم
ياعلكم فحاميات اللواهيب..
ياللي على الوالد خبيث لغاكم
شفت الجفا والحيف والغلب والريب..
بضلوعكم لابيض الله قراكم
عسى نساكم ماتحمل ولا تجيب..
ولا أحد من البزران يمشي وراكم
اخسوا خسيتوا ياكبار اللغابيب..
اهبوا هبيتوا يقطع الله نماكم
ــــــــــــــــــ
اوصيكم برضا الوالدين